هذا الشاعر جاء وحضر زواج حبيبته اقرأوا ايش قال

[بنوتة جده]

هو يخاطب بهذي الكلمات زوج حبيبته أقرأو أيش قال :



أبد .. ما جيت أبارك ولكن جيـت باوصّيـك
على اللي ناوي ٍ تدخل بهـا الليلـه .. مُعذّبْتـي


ترى لولا الظروف اللي عطتْك وحدّت محاكيك
قسم بالله ما تدخل عليهـا لـو علـى رْقبْتـي


ولكنّ النصيب أقوى ولا ادري ويش اسوّي فيك
نعم .. صارت معزّبتك .. ولا صارت معزّبْتي


كذا شاءت بنا الأقدار تحرمني لجـل تعطيـك
كذا لازم عشان تفوز إنت .. أخسر بتجربْتـي


تراها غاليه جـداً .. وتكفـى .. والله يخليـك
تـدللها .. تدلعهـا .. تنسّيـهـا مصاحبْـتـي


أنا من كثر ما أغليها أحس إني بديـت أغليك
ولا تسـأل بأيّـة حـق ولا ّ وش مناسبْـتـي


لأنك لو بتسألني بتسمع شـيء مـا يرضيـك
لذا ياخـوي لا تسـأل ولا تسمـع لأجوبْتـي


أبيك تحطها في داخل عيونـك وبيـن أيديك
وهي دلوعه اعتـادت علـى كثـرة مداعبْتـي


فداعبها شوي شـوي حتـى تشتهـي طاريـك
وشاغبها ألين تقـول لـك: بطّـل مشاغبْتـي


واذا هي مالها خلقك..ولا تضحك ولا تسلّيـك
تحمّلها وإسألهـا: يـا عمـري ليـه عصّبْتـي


وبالك اسمع انّك يوم تضربها وهـي تشكيـك
ما يحتاج اروي لك بفـن الضـرب موهبْتـي


صحيح انك بتملكها ومعـك الصـك بالتمليـك
وأنا عارف حدود الله ومـن حقـك معاقبْتـي


ولكن قلّها المجنـون وصّانـي وهـو يعنيـك
يقول انّـه بينتظـرك ولـو شيّـب وشيّبْتـي


وأنا مجنونها اللي ما نساها وأنت مـا يمديـك
تغطّي ذكرياتي في هواها.. وربْـع تجربْتـي


أحس إني تماديت بكلامي.. والغضب حاديـك
ولو انّك في مكاني ما تفكّـر فـي محاسبْتـي


كفاك إني تركت الليله أشغالي عشـان اجيـك
دخلت القاعه برجلي ولا ادري ويش عاقبْتـي


وأنا ما جيت أخرب عرسك الليلـه ولا أذّيـك
أنا جيتك عشان اخاطبـك واسمـع مخاطبْتـي


توصّى..وانتبه..واحرص عليهـا والله يهنّيـك
ترى كل الكلام اللي طلَع من ضيقـيَ وكبْتـي


ولكن ما قدرت انّي أقوله وانـت مـا يخفيـك
أخاف انّـي إذا قلتـه تقـوم وتقطـع رْقبْتـي

[غــــرور ..!]

يسلمــــوووو ..,